மக்கள் போராட்டங்களால் நேபாளம் பற்றி எரியும் நிலைக்கு ஆளாகியிருக்கிறது. இந்த சூழலில் அந்நாட்டு பிரதமர் கே.பி.சர்மா ஒலி தனது பதவியை ராஜினாமா செய்திருக்கிறார்.
நேபாளத்தில் அரசுக்கு எதிரான போராட்டங்கள் நாளுக்கு நாள் வலுத்து வருகின்றன. தலைவிரித்தாடும் ஊழல், அரசியல் குழப்பங்கள், பொருளாதார நெருக்கடி ஆகியவை காரணமாக ஆட்சிக்கு நெருக்கடி ஏற்பட்டுள்ளது. நேபாள அரசுக்கு எதிராக பல்வேறு போராட்டங்களும் தொடர்ந்து நடைபெற்று வந்தன. இந்நிலையில் சமூக வலைதளங்களுக்கு புதிய கொள்கை வகுத்தது பெரிய பிரச்சினையாக மாற்றியிருக்கிறது. ஆட்சிக்கு எதிரான கருத்துகள், இணைய வழி மோசடிகள் எனப் பல்வேறு விஷயங்களை சுட்டிக் காட்டி உச்ச நீதிமன்றம் உத்தரவு பிறப்பிக்க, அதற்கேற்ப புதிய கொள்கையை அந்நாட்டு அரசு வகுத்தது.
இதனை அமல்படுத்தியதும் டிக்டாக் தவிர மற்ற சமூக வலைதளங்களுக்கு தடை விதிக்கும் நிலை ஏற்பட்டது. இது Gen Z இளைஞர்கள் மத்தியில் பெரிய அதிர்ச்சியை ஏற்படுத்த, போராட்டக் களம் அடுத்தகட்டத்தை நோக்கி மிகவும் சீரியசாக நகர ஆரம்பித்தது. போராட்டம், வன்முறை, தடியடி, கண்ணீர் புகைக் குண்டுகள் வீச்சு, துப்பாக்கிச்சூடு என விஷயம் சீரியசாக மாறியிருக்கிறது. இதில் 19 பேர் உயிரிழந்துள்ளதாக கூறப்படுகிறது. மேலும் 300க்கும் மேற்பட்ட மக்கள் படுகாயம் அடைந்துள்ளனர். அந்நாட்டு நாடாளுமன்றத்தில் நுழைவதற்கு முயற்சித்துள்ளனர்.