சென்னை ஒன் செயலியைப் பயன்படுத்தும் வாடிக்கையாளர்களுக்கு ஒரு ரூபாய் சலுகை டிக்கெட் திட்டம் இன்று முதல் அறிமுகப்படுத்தப்பட்டுள்ளது.
சென்னையில் பொதுப் போக்குவரத்தை ஊக்குவிக்கும் வகையில் மாநகரப் பேருந்து, மெட்ரோ ரயில், புற நகர் ரயில்களில் பயன்படுத்தும் டிஜிட்டல் செயலியான Chennai One- செயலியை முதலமைச்சர் ஸ்டாலின் கடந்த செப்டம்பர் 22 ஆம் தேதி தொடங்கிவைத்தார். Chennai One- செயலி மூலம் ஆட்டோ, வாடகை கார்களையும் முன்பதிவு செய்து பயன்படுத்தலாம். அறிமுகப்படுத்தப்பட்டது முதல் இதுவரை, சென்னை ஒன் செயலியை 5.5 லட்சம் பேர் பதிவிறக்கம் செய்துள்ள நிலையில், சுமார் 8 லட்சம் டிக்கெட்கள் வாங்கப்பட்டுள்ளன.
இந்நிலையில், பொதுப் போக்குவரத்து மற்றும் பணமில்லா பரிவர்த்தனையை ஊக்குவிக்கும் வகையில், சென்னை ஒன் செயலி பயன்படுத்துவோருக்கு ஒருமுறை பயன்படுத்தும் வகையில் கட்டண சலுகை அளிக்கப்பட்டுள்ளது. அதாவது சென்னை ஒன் செயலி மூலம் ஒரு ரூபாய் கட்டணத்தில், பேருந்து அல்லது மெட்ரோ ரயில் அல்லது புறநகர் ரயில்களில் ஒரே ஒரு டிக்கெட்டை மட்டும் பெற்றுக் கொள்ளலாம்.