ஜே.இ.இ தயாரிப்பு என்பது, ‘சரியாகப் படி, திட்டத்தைப் பின்பற்று, தேர்வில் வெற்றி பெறு’ என்ற ஒரே நேர் கோடு போன்ற பயணமாகப் பலரால் சொல்லப்படுகிறது. ஆனால் உண்மை மிகவும் சிக்கலானது. கெட்ட நாட்கள் வாரங்களாக நீடிக்கலாம். நண்பர்கள் முன்னேறிச் செல்வது போல் தோன்றும் போது, நீங்கள் மட்டும் ஒரு இடத்தில் சிக்கித் தவிப்பது போல் உணர்வீர்கள். உங்கள் தயாரிப்புப் பாதை திசை மாறும் போது, உடனடியாக ஏற்படும் உணர்வு பீதி. ஆனால் பீதி அடைவதால் எந்தத் தீர்வும் கிடைக்காது; சரியான கண்ணோட்டம்தான் தீர்வைத் தரும்.
உண்மை எளிமையானது: திட்டமிட்டபடி செல்லவில்லை என்றால், எங்கும் செல்லவில்லை என்று அர்த்தமல்ல.
திட்டங்கள் தோல்வியடையப் பல காரணங்கள் இருக்கலாம். உதாரணமாக:
*அதிகமான இலக்கு கொண்ட கால அட்டவணைகள்.
*அடிப்படைப் பாடங்களில் தெளிவின்மை.
*அதிகப்படியான சோர்வு (Burnout).
*மற்றவர்களுடன் ஒப்பிடுவது.
*வெளிப்புற அழுத்தம்.
இவற்றில் எதுவும் உங்கள் புத்திசாலித்தனத்தையோ அல்லது திறமையையோ வரையறுக்கவில்லை. இவை, உங்கள் தற்போதைய படிக்கும் முறைக்குச் சீரமைப்பு (Adjustment) தேவை என்பதைக் குறிக்கின்றன. அதை முற்றிலும் கைவிட வேண்டும் என்று அர்த்தமல்ல.
“நான் ஏன் இவ்வளவு பின்தங்கிவிட்டேன்?” என்று கேட்பதற்குப் பதிலாக, “சரியாக எது வேலை செய்யவில்லை?” என்று கேளுங்கள்.
*நேர நிர்வாகமா?
*கருத்துக்களின் தெளிவின்மையா?
*திருப்புதல் (Revision) செய்யாமல் இருப்பதா?
*தொடர்ந்து படிக்காமல் இருப்பதா?
பிரச்சனையை அடையாளம் காண்பது, தீர்வின் பாதியாகும். ஜே.இ.இ என்பது அதிகமாகப் படிப்பது பற்றியது அல்ல; புத்திசாலித்தனமாகப் படிப்பது பற்றியது.
மாணவர்கள் செய்யும் ஒரு பெரிய தவறு என்னவென்றால், இழந்த நேரத்திற்கு ஈடுகொடுக்க, ஓய்வில்லாமல் படிப்பது, தூக்கத்தை தியாகம் செய்வது. இதனால் மனம் சோர்வடையும், சோர்வான மனம் சரியாகக் கற்றுக்கொள்ளாது. எனவே, நீண்ட காலத்திற்கு உழைக்கக்கூடிய, நிலையான முன்னேற்றமே (Sustainable Progress), திடீரெனப் படிக்க எடுக்கும் தீவிர முயற்சிகளை விடச் சிறந்தது.
மற்றொரு கடினமான உண்மை என்னவென்றால், ஒவ்வொருவரின் பயணமும் வித்தியாசமானது. சிலர் ஆரம்பத்திலேயே உச்சத்தை அடைவார்கள், சிலர் தாமதமாக அடைவார்கள். ஜே.இ.இ, யார் முதலில் படிக்க ஆரம்பித்தார்கள் என்பதற்குக் கூலி கொடுக்காது; தேர்வு நாளில் யார் பாடங்களை சிறப்பாகப் புரிந்துகொண்டுள்ளார்கள் என்பதற்கே வெகுமதி அளிக்கும். சில மாதங்கள் மட்டும் நீங்கள் முழு கவனத்துடன் படித்தாலும் கூட, ஒரு பெரிய திருப்புமுனையை உருவாக்க முடியும்.
உங்கள் சுய மதிப்பீட்டை (Self-worth) உங்கள் மாதிரித் தேர்வு மதிப்பெண்ணில் இருந்து பிரித்துப் பார்ப்பதும் அவசியம். நீங்கள் உங்கள் மாதிரித் தேர்வு தரவரிசை அல்ல. நீங்கள் ஒரு போட்டி நிறைந்த சூழலில் மிகவும் கடினமான விஷயத்தைச் செய்ய முயற்சிக்கும் மாணவர். இந்த முயற்சியே மதிக்கத்தக்கது.
தயாரிப்புப் பாதை தடம் புரண்டால், மீண்டும் ஆரம்பிக்க வேண்டாம் – மீட்டமைக்கவும் (Reset). உங்களுக்குப் புதிதான திட்டம் தேவையில்லை; ஒரு யதார்த்தமான திட்டம் தேவை.
*பாடத்திட்டத்தைப் பிரித்து, நிர்வகிக்கக்கூடிய சிறிய பகுதிகளாகப் படியுங்கள்.
*அதிக மதிப்பெண் கொண்ட முக்கியப் பாடங்களுக்கு (High-weightage topics) முன்னுரிமை அளியுங்கள்.
*உங்களுக்குத் தெரியாததைத் துரத்துவதற்கு முன், ஏற்கனவே உங்களுக்குத் தெரிந்தவற்றைத் திருத்துங்கள்.
மெதுவாக இருந்தாலும், முன்னேற்றம் தன்னம்பிக்கையை மீண்டும் கட்டியெழுப்பும்.
மிக முக்கியமாக, இதை நினைவில் கொள்ளுங்கள்: ஜே.இ.இ என்பது ஒரு தேர்வு, உங்கள் வாழ்க்கையின் தீர்ப்பு அல்ல. நீங்கள் அதில் வெற்றி பெற்றாலும் இல்லாவிட்டாலும், உங்கள் எதிர்காலத்தில் வாய்ப்புகளும், வளர்ச்சியும், அர்த்தமும் இருக்கும். இந்த உண்மையை உணர்ந்த மாணவர்கள் பெரும்பாலும் அமைதியாகவும், அதிகக் கவனத்துடனும் இருப்பதால், சிறப்பாகச் செயல்படுகிறார்கள்.
உங்கள் ஜே.இ.இ தயாரிப்புத் திட்டமிட்டபடி போகவில்லை என்றால், நீங்கள் தனியாக இல்லை. ஜே.இ.இ கற்றுத்தரும் மிக முக்கியமான பாடம் நெகிழ்வுத்தன்மை (Resilience) ஆகும். அந்தப் பாடம் தேர்வு அறைக்கு அப்பாலும் உங்களுடன் இருக்கும்.
Nandri indianexpress
